බ්‍රිතාන්‍ය රෝහලකදී අලුත උපන් බිළිඳුන් 07 දෙනෙකු ඝාතනය කිරීම සම්බන්ධයෙන් එම රෝහලේ හෙදියක් වරදකාරියවී තිබේ.
ඒ බ්‍රිතාන්‍යයේ දරුණුතම ළමා ඝාතකයා බවට පත්වෙමිනි.
33 හැවිරිදි එම හෙද නිලධාරිනිය සේවය කළ රෝහලේ නව ජන්ම ඒකකය තුළ සිටි බිළිඳුන් 07 දෙනෙකු 2015 වසරේ ජුනි මාසයේ සිට ගතවු වසරක කාලය තුළ ඝාතනය කර ඇති අතර තවත් බිළිඳුන් 06 දෙනෙකු ඝාතනය කිරීමට උත්සාහ කර ඇති බව සඳහන් වෙයි.
කෙසේවෙතත් රෝහල තුළ සිදුවු මෙම බිළිඳු මරණ සම්බන්ධයෙන් නිසි විමර්ශනයක් සිදුනොකිරීම පිළිබඳව එම රෝහල් බලධාරීන් හට චෝදනා එල්ලවී තිබේ.
අදාළ හෙද නිලධාරිනියගේ සැකකටයුතු ක්‍රියාකලාපය සම්බන්ධයෙන් ඇතැම් වෛද්‍යවරුන් රෝහල් බලධාරීන්ට පැමිණිලි කර තිබුණද ඒ පිළිබඳව කිසිදු විමර්ශනයක් සිදුවී නොමැති බවද වාර්තා වෙයි.
වාහන ජාවාරමක නිරත වූ තිදෙනෙකු අත්අඩංගුවට
කුලී පදනම මත ලබාගත් වාහන, ව්‍යාජ ලේඛන සකස් කර අලෙවි කිරීමේ ජාවාරමක නිරත වූ කාන්තාවක් ඇතුළු පුද්ගලයන් තිදෙනෙකු පාණදුර කොට්ඨාස අපරාධ විමර්ශන කාර්යාංශය මඟින් අත්අඩංගුවට ගෙන තිබේ.
කුලී පදනම මත පාණදුර ප්‍රදේශයේ පුද්ගලයෙකුගෙන් වාහනයක් ලබාගෙන, ව්‍යාජ ලේඛන සකස් කර අලෙවි කර ඇති බවට ලද පැමිණිල්ලක් මත සිදුකළ විමර්ශනයක දී මෝටර් රථ 02ක් ද සමඟ මොවුන් අත්අඩංගුවට ගෙන ඇති බව පොලීසිය පවසයි.
සිදුකළ විමර්ශනවල දී අලෙවි කරන ලද හා උකස් කරන ලද තවත් මෝටර් රථ 02ක් මෙන්ම ව්‍යාජ ලෙස සකස් කරන ලද රියදුරු බලපත්‍ර ඇතුළු ලේඛන රැසක් සොයාගෙන තිබේ.
සැකකරුවන් දෙදෙනා දඹුල්ල හා කල්එළිය ප්‍රදේශවල පදිංචිකරුවන් වන අතර, සැකකාරිය පොළොන්නරුව ප්‍රදේශයේ පදිංචිකාරියක් බව අනාවරණය වී ඇත.
සැකකරුවන් පාණදුර මහෙස්ත්‍රාත් අධිකරණයට ඉදිරිපත් කිරීමට නියමිතයි.
