කිරුළක ශ්රී විභූතියෙන් වැසී ගියද, රාජකීය මාළිගාවේ දැවැන්ත තාප්පවලින් එහා සිදුවන ඇතැම් සිදුවීම් සාමාන්ය මනුෂ්යත්වයේ සැබෑ ස්වභාවය ලොවට හඬගා කියයි.
නැසීගිය දෙවැනි එලිසබෙත් මහ රැජින සහ සසෙක්ස්හි ආදිපාදවරිය වන මේගන් මාකල් අතර පැවති මතභේදාත්මක සම්බන්ධතාවය පිළිබඳව යළිත් වරක් ලෝකයේම අවධානය යොමු වී තිබේ. ඒ, මේගන් විසින් වින්ඩ්සර් මාලිගාවේ සේවය කළ උද්යාන පාලකයෙකුට රළු ලෙස සැලකීම හේතුවෙන් මහ රැජිනගෙන් ඇයට දැඩි දෝෂාරෝපණයක් එල්ල වූ බවට රාජකීය ලේඛක හියුගෝ විකර්ස් විසින් සිදුකළ නවතම හෙළිදරව්වත් සමඟිනි. “Daily T” නමැති වැඩසටහනට එක්වෙමින් සහ සිය නවතම ග්රන්ථය හරහා ඔහු මේ බව අනාවරණය කර ඇත.
තම සේවකයින්ට දක්වන සැලකිල්ල සහ ගෞරවය සම්බන්ධයෙන් මහ රැජින සෑම විටම අනුගමනය කළේ දැඩි ප්රතිපත්තියකි. කනිෂ්ඨ උද්යාන පාලකයෙකුට මේගන් මාකල් අපහාසාත්මක ලෙස කතා කළ බව ප්රධාන උද්යාන පාලකයා විසින් මහ රැජිනට දැනුම් දුන් වහාම, ඈ සිය මෝටර් රථයෙන් වහාම එම ස්ථානයට පැමිණ මේගන්ට ඇගේ ‘තැන’ පෙන්වා දුන් බව පැවසේ. සේවකයින් කුමන මට්ටමක සිටියද ඔවුන්ට නිසි ගෞරවය දැක්වීම අනිවාර්ය බව එහිදී රැජින විසින් තරයේ අවධාරණය කර තිබේ.
මෙම සිදුවීම හුදෙක් එක් වරදවා වටහාගැනීමක් පමණක් නොව, ඔවුන් අතර පැවති නොනිවෙන සීතල යුද්ධයක එක් පැතිකඩක් බව විකර්ස් සිය “Queen Elizabeth II: A Personal History” කෘතියෙන් පෙන්වා දෙයි. හැරී කුමරුට මේගන් සමඟ විවාහ වීමට පෙර අවම වශයෙන් වසරක්වත් කල් ගන්නා ලෙස රැජින උපදෙස් දී තිබුණද, ඔහු එය නොසලකා හරිමින් 2017 වසරේ නොවැම්බර් මාසයේදී විවාහ ගිවිසගෙන මාස හයකට පමණ පසු 2018 මැයි මාසයේදී යුගදිවියට පිවිසියේය. ඉන් අනතුරුව, 2021 වසරේදී ඔප්රා වින්ෆ්රි සමඟ ඔවුන් කළ ආන්දෝලනාත්මක සම්මුඛ සාකච්ඡාව සහ රාජකීය පවුලෙන් වෙන්ව යාම වැනි ක්රියා කලාපයන් හරහා, වසර 70ක් පුරා කිරුළ දැරූ රැජිනගේ ජීවිතයේ අවසන් කාල පරිච්ඡේදය තුළ ඇයට දරාගත නොහැකි තරම් මානසික පීඩනයක් එල්ල කිරීමට මෙම යුවළ සමත් වූහ.
මෙම අර්බුදකාරී තත්ත්වය කොතරම් දුරදිග ගියාද යත්, හැරී කුමරු සිය මිත්තණියට දුරකථන ඇමතුමක් ගන්නා සෑම විටම, රැජින තමා අසලින් රැඳී සිටින ලෙස සිය සහායිකාවකට උපදෙස් දුන් බව කියවේ. ඔප්රා වින්ෆ්රිගේ සම්මුඛ සාකච්ඡාවෙන් පසු තත්ත්වය තවත් උග්ර වූ අතර, රැජින සිය මුණුබුරාගේ ඇමතුම්වලට ප්රතිචාර දැක්වීමෙන් පවා වැළකී ඉතා පරෙස්සම් සහගතව කටයුතු කළාය. මේ සියල්ලෙන් පෙනී යන්නේ, පිටතින් සිනහමුසු මුහුණින් පෙනී සිටියද, රජ පවුල ඇතුළත කොතරම් ගැඹුරු සහ නොවිසඳුණු අර්බුද මාලාවක් පැවතියේද යන්නයි.
ලෝකයක් පාලනය කළ හැකි බලයක් සහ කිරුළක් හිමි වුවද, තම ආදරණීයයන්ගෙන් හිමිවන මානසික පීඩනය ඉදිරියේ රාජකීයත්වයට පවා නිහඬව කඳුළු සැලීමට සිදුවන බව මින් කදිමට සනාථ වේ.
