ජීවිතය කියන්නේ හරිම පුදුමාකාර දෙයක්. මොහොතකින් මොනවා වෙයිද කියලා කාටවත් කියන්න බැහැ.
තමන්ගේ දරු පවුල ජීවත් කරවන්න දහඩිය හෙළපු තරුණ පියෙකුට, තමන්ගේ රැකියාවම මාරයා වෙලා ආපු අවාසනාවන්ත පුවතක් අද බියගම හේනිහත්ත ප්රදේශයෙන් වාර්තා වෙනවා.
අහුගම්මන ප්රදේශයේ පදිංචිව සිටි 39 හැවිරිදි කුලතුංගගේ අසංක කියන්නේ හැමෝම එක්ක සුහදව හිටපු විවාහක පුද්ගලයෙක්. ඊයේ (12) දවසත් ඔහුට සාමාන්ය දවසක් වුණා. තමන්ගේ රැකියාව විදියට ඔහු තෝරාගෙන තිබුණේ ගස් කැපීමයි. එදත් ඔහු හේනිහත්ත ප්රදේශයේ ගෙවත්තක තිබුණු විශාල නැදුන් ගසක් කපන්න සූදානම් වුණා.
නමුත් ඒ නැදුන් ගස ඔහුගේ ජීවිතයේ අවසන් ගස වෙයි කියලා කවුරුත් හිතුවේ නැහැ…
ගසේ අඩි 20ක් විතර උඩට නැගලා අතු කපමින් හිටපු අසංකගේ පය ලිස්සා ගියේ එක නිමේෂයකින්. මුළු පළාතම නිහඬ කරමින් ඔහු අඩි 20ක ඉහළ සිට බිමට ඇද වැටුණේ දරුණු අනතුරකට මුහුණ දෙමින්. අනතුරේ බරපතළකම නිසාම ඔහුට නැවත නැගිටින්න අවස්ථාවක් ලැබුණේ නැහැ. ඒ ස්ථානයේදීම ඔහුගේ පණ නල වාතලයට මුසු වුණා.
සිද්ධිය ආරංචි වූ සැනින් බියගම පොලිසිය සහ හදිසි මරණ පරීක්ෂක වෛද්ය හර්ෂජිත් ගුණසේකර මහතා එම ස්ථානයට පැමිණියා. පරීක්ෂණවලින් පස්සේ දේහය පශ්චාත් මරණ පරීක්ෂණය සඳහා රාගම ශික්ෂණ රෝහලට යොමු කෙරුණු අතර, අද (13) දින එහි පරීක්ෂණ කටයුතු සිදුවීමට නියමිතයි.
බියගම පොලිස් ස්ථානාධිපති ප්රධාන පොලිස් පරීක්ෂක අජිත් විජේසිංහ මහතා ඇතුළු කණ්ඩායම මේ වන විටත් සිද්ධිය සම්බන්ධයෙන් වැඩිදුර පරීක්ෂණ මෙහෙයවනවා.
එක මොහොතක ගසක් මත ජවයෙන් වැඩ කරමින් සිටි තරුණයෙක්, ඊළඟ මොහොතේ නිහඬ දේහයක් බවට පත්වීම මුළු අහුගම්මන ගම්මානයම කඳුළින් තෙත් කර තිබෙනවා. හරි හම්බ කරලා පවුල රකින්න ගිය අසංකට අවසානයේ උරුම වුණේ නොසිතූ මරණයක්.
