මහියංගනය – බදුල්ල ප්‍රධාන මාර්ගයේ මාපාකඩ ප්‍රදේශයේ සිද්ධ වු රිය අනතුරකින් තරුණයෙක් මියගොස් ඇති බව පොලීසිය පවසයි.

ඊයේ (27) අලුයම් කාලයේදී, මොනරාගල සිට මහියංගනය දක්වා ධාවනය වෙමින් තිබූ කැබ් රියක් රියදුරුට නින්ද යෑම හේතුවෙන් මාර්ගයෙන් ඉවතට ධාවනය වී ගසක වැදී තිබුණි.

එහිදී ප්‍රතිකාර සඳහා රියදුරා සහ තවත් පුද්ගලයෙක්ව රෝහල්ගත කළ අතර රියදුරා මහියංගනය රෝහලේ ප්‍රතිකාර ලබමින් සිටියදී ජීවිතක්ෂයට පත්ව තිබේ.

ඔහු නක්කල, මොනරාගල පදිංචිව සිටි 33 හැවිරිදි අයෙකි.

නියඟය වසන්තයක් කරගත් නොමිනිසුන්

ජලය සොයා පැමිණෙන සතුන් දඩයම් කිරීමේ නිරත සිටි පුද්ගලයින් 13 දෙනෙකු අත්අඩංගුවට ගෙන තිබේ.

පවතින නියං තත්ත්වය හේතුවෙන් ජලය සොයා විල්පත්තුව වන උද්‍යානය සහ තබ්බෝව අභය භූමිය මැදින් ගලා යන කලා ඔයට පැමිණෙන සතුන් සංවිධානාත්මක ලෙස දඩයම් කිරීම සම්බන්ධයෙන් මෙම සැකකරුවන් අත්අඩංගුවට ගෙන ඇත.

ඒ, වනාතවිල්ලුව හා කරුවලගස්වැව වනජීවි නිලධාරීන් එක්ව සිදුකළ මෙහෙයුමකදීය.

මොවුන් දින ගණන් කඳවුරු බැඳ වන සතුන් දඩයම් කිරීමේ නිරතව සිට ඇති අතර ඔවුන් සතුව තිබී කොටන ගිනි අවියක්, බෝර 12 ගිනි අවියක්, පිහි, විදුලි පන්දම්, මූනිස්සම් පුරවන පතොරම් කොපු, මූනිස්සම්, අහස්කූරු, යතුරුපැදි 7ක් සහ කූඩාරම්ද සොයාගෙන තිබේ.

අත්අඩංගුවට ගෙන ඇත්තේ අවුරුදු 35 ත් 67 ත් අතර වයස්වල පසුවන්නන් වන අතර ඔවුන් වනාතවිල්ලුව, පුත්තලම ඇතුළු ප්‍රදේශ කිහිපයක පදිංචිකරුවන්ය.

වැටලීම අතරතුරදී තවත් සැකකරුවන් 8 දෙනෙකු පළාගොස් ඇති අතර ඔවුන් සොයා මෙහෙයුම් ක්‍රියාත්මකය.

අත්අඩංගුවට ගත් සැකකරුවන් පුත්තලම අධිකරණයට ඉදිරිපත් කිරීමට නියමිතය.