ඉන්දියාවේ නව ජනාධිපතිවරයා ලෙස ගෝත්රික දේශපාලනඥයෙකු වන ද්රෞපදි මුර්මු තේරී පත්වුණා.
පාලක භාරතීය ජනතා පක්ෂයේ (BJP) අපේක්ෂකයා වන 64 හැවිරිදි ඇය ඔඩිෂා ප්රාන්තයෙන් පැමිණ ප්රාන්ත ආණ්ඩුකාරවරයෙකු ලෙස ද කටයුතු කළ හිටපු ගුරුවරියක්.
මුර්මු ඉන්දීය ජනාධිපති ධුරයට පත් පළමු ගෝත්රික නායිකාවයි.
ඉන්දියාවේ ජනාධිපතිවරයා රාජ්ය නායකයා වන නමුත් විධායක බලතල හිමිවන්නේ නැහැ.
පාර්ලිමේන්තුවේ මන්ත්රී මණ්ඩල දෙකෙහි (ලෝක් සභා සහ රාජ්ය සභා) පාර්ලිමේන්තු මන්ත්රීවරු, ප්රාන්ත සභා සහ මධ්යම ආණ්ඩුවේ පාලනය සහිත ව්යවස්ථාදායක සභා (දිල්ලි සහ පුදුචෙරි) සාමාජිකයන්ගේ ඡන්දයෙන් ඉන්දීය ජනාධිපතිවරයා තෝරා ගනු ලබනවා.
කාශ්මීරයේ නියෝජිතයන්ට ද එම අවස්ථාව නීතියෙන් හිමිව තිබුණ ද මේ වන විට කාශ්මීරයේ සභාවක් නොමැති බැවින් මෙවර ජනාධිපතිවරණයේ දී කාශ්මීර මතය අදාළ වූයේ නැහැ.
මුර්මුගේ ප්රතිවාදියා වූයේ ප්රවීණ දේශපාලනඥයෙකු වන යෂ්වන්ත් සිංහායි.
1990 දශකයේ සහ 2000 දශකයේ මුල් භාගයේ එවකට අගමැති අතල් බිහාරි වජ්පායි විසින් නායකත්වය දුන් භාරතීය ජනතා පක්ෂ ආණ්ඩුවේ ජ්යෙෂ්ඨ අමාත්යවරයකු වූ සිංහා දැන් පක්ෂය සහ අගමැති නරේන්ද්ර මෝදි දැඩිව විවේචනය කරන්නෙක්.
භාරතීය ජනතා පක්ෂය අපේක්ෂකයින් 20 දෙනෙක් පිළිබඳ දීර්ඝ සාකච්ඡාවකින් පසු ආදිවාසි ග්රෝතික නායිකා ද්රෞපදි මුර්මු ජනාධිපති අපේක්ෂකයා ලෙස තෝරා ගත්තා.
ඇයගේ නාමයෝජනා පිළිබඳ රූපවාහිනියෙන් දැනගත් බවත්, එම ප්රවෘත්තිය තමාව “පුදුමයට” සහ “ප්රීතියට” පත් කළ බවයි ඇය පැවසුවේ.
“දුරස්ථ මයූර්බන්ජ් දිස්ත්රික්කයේ ගෝත්රික කාන්තාවක් ලෙස, මට භාරතයේ ඉහළම තනතුරට අපේක්ෂකයා වීම ගැන සිතුවිල්ලක්වත් තිබුණේ නැහැ,” නාමයෝජනා ලැබීම ගැන දැනගත් පසු ඇය වාර්තාකරුවන් හමුවේ පවසා සිටියා.
ඔඩිෂා ප්රාන්තයේ දේශපාලන නායකයින් ඇය හැඳින්වූයේ “පාංශු දියණිය” ලෙසයි.
ද්රෞපදි මුර්මු සම්බන්ධයෙන් 2017 දී කතාබහක් ඇති වන්නේ එම වසරේ ජනාධිපතිවරණය සඳහා භාරතීය ජනතා පක්ෂය ඇගේ නම සලකා බලන බවට කටකතා පැතිරීමත් සමඟ යි.
ඇය එවකට ජාර්කන්ඩ් ප්රාන්තයේ ආණ්ඩුකාරවරිය ලෙස කටයුතු කළා.
භාරතීය ජනතා පක්ෂය දශක දෙකක පමණ කාලයක සිට ජනාධිපතිවරණය සඳහා සුලුතර ජන කණ්ඩායම් නියෝජනය කරන අපේක්ෂකයින්ට සහාය පළ කිරීමට හෝ ඉදිරිපත් කිරීමට පෙළඹී සිටිනවා.
2002දී න්යෂ්ටික වැඩසටහනේ පියා ලෙස සැලකෙන ආචාර්ය අබ්දුල් කලාම් නම් ඉස්ලාම් භක්තිකයා ජනාධිපතිවරණයට තෝරා ගත් භාරතීය ජනතා පක්ෂය 2007 දී කේ. ආර්. නාරයන් නම් දලිත්වරයාට සහාය පළ කළා.
2017 දීත් භාරතීය ජනතා පක්ෂය දලිත්වරයෙක් වන රාම් නාත් කෝවින්ද් ජනාධිපති අපේක්ෂකයා ලෙස තෝරා ගත්තා.
ලබන 24 වැනිදායින් ධුර කාලය නිමා කරන කෝවින්ද්ගෙන් පසු එම ධුරය දැරීම සඳහා භාරතීය ජනතා පක්ෂය තෝරා ගනු ලැබුවේ ආදිවාසි සන්තාල් ගෝත්රික ප්රජාව නියෝජනය කරන ද්රෞපදි මුර්මුවයි.
මේ හරහා භාරතීය ජනතා පක්ෂය පැවසීමට උත්සාහ කරනුයේ තමන්ගේ පක්ෂය සියලු දෙනාට පිළිගත හැකි මෙන්ම ඕනෑම කෙනෙකුට පැමිණිය හැකි පක්ෂයක් ලෙස ජනතාව අතර ප්රසාදයක් ඇතිකර ගැනීම විය හැකියි.
එමෙන්ම හින්දූත්ව සංකල්පය ප්රතික්ෂේප කරන ගෝත්රික කණ්ඩායම් වර්ධනය වෙමින් ඇති පසුබිමක භාරතීය ජනතා පක්ෂයේ අරමුණ වන පොදු මතවාදයකට සියලු පාර්ශ්ව එක් කරගැනීම සඳහා ගෝත්රික නායිකාවක ජනපති ධුරයට ඔසවා තැබීම බීජේපීයේ දිගු කාලීන දේශපාලන උපායමාර්ගික සැලැස්මේ කොටසක් වීමේ හැකියාව ද පවතිනවා.
ඊසාන දිග ඉන්දියාවේ සිය ආධිපත්ය තහවුරු කර ගනිමින් සිටින භාරතීය ජනතා පක්ෂයට එම ප්රදේශවල බහුතරයක් වෙසෙන ක්රිස්තියානි ආගම අදහන ගෝත්රික ප්රජාවගේ සහය ලබා ගැනීම ද ද්රෞපදි මුර්මු හරහා පක්ෂය බලාපොරොත්තු වනු ඇති.
1958 දී මයුර්බන්ජ් දිස්ත්රික්කයේ බයිදාපෝසි ගම්මානයේ උපත ලද මුර්මු නියෝජනය කරන සන්තාල් ප්රජාව ඉන්දියාවේ විශාලතම ගෝත්රික කණ්ඩායම්වලින් එකක්.
ගම් සභා ප්රධානියකුගේ දියණියක් වන ඇය ප්රාන්ත අගනුවර වන බුබනේස්වර් හි රාමදේවි කාන්තා විද්යාලයේ ඉගෙනුම ලැබුවා.
ආරම්භයේ ගමේ පාසලේ අධ්යාපනය හැදෑරු ඇය සිය පියා සමග අසල නගරය පැවති ප්රාන්ත අමාත්යවරයෙකු සහභාගී වූ දේශපාලන රැළියක් නැරඹීමට ගිය අවස්ථාවේ හදිසියේම වේදිකාවට නැග තමන්ට භුබනේෂ්වර් හි ඉගෙනීමට අවශ්ය බව පවසා තිබෙනවා.
කුඩා දැරියගේ උද්යෝගය පිළිබඳව අමාත්යවරයා කෙතරම් පැහැදුණා ද යත්, ඇයට ප්රාන්ත අගනුවර රජයේ පාසලකට ඇතුළත් වීමට පහසුකම් සලසන ලෙස අමාත්යවරයා සිය කාර්යමණ්ඩලයට උපදෙස් දී තිබෙනවා.
පාසල් අධ්යාපනයෙන් පසු ඔඩිෂා රජයේ ලිපිකරුවෙකු ලෙස සිය වෘත්තීය ජීවිතය ආරම්භ කළ ද්රෞපදි මුර්මු 1979-1983 දක්වා වාරිමාර්ග හා බලශක්ති දෙපාර්තමේන්තුවේ කනිෂ්ඨ සහකාරවරියක් ලෙස සේවය කළා.
නැන්දම්මාගේ බලකිරීම මත ඇය භුබනේස්වර් හි රැකියාවෙන් ඉවත් වී තම පවුල රැකබලා ගැනීම සඳහා රයිරන්ග්පූර් වෙත ආපසු පැමිණි අතර පසුව ශ්රී අරොබින්දෝ පාසලේ ගුරුවරියක් ලෙස පත්වීමක් ලැබුවා.
නමුත් ඇය වැටුපක් ගැනීම ප්රතික්ෂේප කළ අතර පාසලින් ඇය ලබා ගත්තේ රික්ෂෝ ගාස්තුව පමණයි.
මෙය රැකියාවක් නොව රාජ්ය සේවයක් බවත් බැංකු නිලධාරියෙකු වන තම සැමියාගේ වැටුප පවුලේ අවශ්යතා සපුරාලීමට ප්රමාණවත් බව ඇගේ අදහස වුණා.
ඇයගේ දේශපාලන ජීවිතය ආරම්භ වූයේ 1997 දී ඇය රයිරන්ග්පූර් හි ප්රාදේශීය මැතිවරණයෙන් මන්ත්රීවරියක් ලෙස තේරී පත්වීමත් සමඟයි.
ඇය බොහෝ විට නගරයේ සනීපාරක්ෂක කටයුතු පෞද්ගලිකව අධීක්ෂණය කරන අතර, කාණු පිරිසිදු කර කසළ ඉවත් කරන තුරු අව්වේ සිටගෙන සිටිනු දක්නට ලැබුණි.
භාරතීය ජනතා පක්ෂයේ සාමාජිකාවක් ලෙස, ඇය 2000 දී සහ 2009 දී – රයිරන්ග්පූර් ආසනයෙන් දෙවරක් ප්රාන්ත සභාවට තේරී පත් වුණා.
2000 සිට 2004 දක්වා ඇය ප්රාන්ත සභාග ආණ්ඩුවේ ඇමතිවරියක් ද වූවා.
මුලින් වානිජ්යය සහ ප්රවාහනය භාරව කටයුතු කළ ඇය පසුව ධීවර හා සත්ව සම්පත් අමාත්යංශ භාරව කටයුතු කළා.
2006 සිට 2009 දක්වා, මුර්මු මහත්මිය භාරතීය ජනතා පක්ෂයේ “උපලේඛනගත ගෝත්ර” සඳහා වන රාජ්ය අංශයේ සභාපතිනිය වූවාය.
2009 දී ඇගේ වැඩිමහල් පුත්රයා හදිසියේ මිය යෑමත් සමඟ ඇගේ ජීවිතය ඛේදනීය මුහුණුවරක් ගනු ලැබුවා.
වසර කිහිපයකට පසු ඇයට දෙවන පුතා සහ සැමියා ද අහිමි වුණා.
තමන්ට තවත් කිසිවක් ජීවිතයේ ඉතිරිව නැතැයි නිතර පවසමින් ශෝකයෙන් මුසපත්ව සිටි ඇය පසුව ක්රමයෙන් ජීවිතය යළි අල්වා ගත්තා.
2015 දී ඇය ජාර්කන්ඩ් හි පළමු කාන්තා ආණ්ඩුකාරවරිය ලෙස පත් කරනු ලැබුවා.
පසුගිය වසරේ ජූලි දක්වා වසර හයක් ඇය එම තනතුර හෙබවූවා.
සිය පාලන කාලය තුළ ආණ්ඩුකාර කාර්යාලය සෑම තරාතිරමකම ජනතාවට විවෘතව තැබීම පිළිබඳව ඇය බොහෝ පාර්ශ්වයන්ගේ ඇගයීමට ලක් වුණා.
මුර්මුගේ පෞරුෂයේ වඩාත්ම කැපී පෙනෙන කොටස වන්නේ “ප්රීතිමත් සහ දුක්බර අවස්ථා දෙකේදීම ඇයගේ සමානාත්මතාවය සහ ඛේදවාචකය හමුවේ ඇයගේ ස්ථීරභාවය” බව ඇගේ දේශපාලන උපදේශක රාජ්කිෂෝර් දාස් පවසනවා.
විපක්ෂයේ ඒකාබද්ධතාවක් නොතිබීම සහ නිවැරදි නායකත්වයක් නොතිබීම භාරතීය ජනතා පක්ෂයට ජනාධිපතිවරණ ජයග්රහණය පහසු කළ බව නොරහසක්.
විපක්ෂයේ තනි පක්ෂයක් ලෙස ප්රබලම ජන පදනම ඇත්තේ කොංග්රස් පක්ෂයටයි.
නමුත් එහි පක්ෂ නායකත්ව අක්රීය වී ඇති අතර රාහුල් ගාන්ධිගේ විශ්වාසය ජනතාව ඉන්දිරා ගාන්ධි හෝ නේරුගේ මතකයන් මත තමන්ට ඡන්දය ලබා දෙනු ඇති බවයි.
නමුත් තවදුරටත් එය එසේ නොවන බව කොංග්රස් පක්ෂය තේරුම් නොගන්නා තාක් භාරතීය ජනතා පක්ෂයට ඉන්දීය දේශපාලනය තුළ අභියෝගයක් නොමැති අතර ඔවුන් පරාජය කිරීමට කිසිවෙකුට හෝ හැකි නොවනු ඇති.
Source:Hirunews