අකුරේගොඩදී නීතීඥවරයෙකු හා ඔහුගේ බිරිඳ වෙඩිතබා ඝාතනය කිරීම සම්බන්ධයෙන් තවත් කරුණු රැසක් බස්නාහිර දකුණ අපරාධ කොට්ඨාසය විසින් අනාවරණ කරගෙන තිබේ.
ඒ අදාළ ඝාතනය සම්බන්ධයෙන් අත්අඩංගුවට ගත් දෙවැනි වෙඩික්කරුගෙන් රඳවාගෙන සිදුකරන ලද ප්රශ්න කිරීම්වලදීය.
තමන් අදාළ ඝාතනය සිදු කිරීමෙන් පසුව කොට්ටාව දක්වා පැමිණ මෝටර් රථයෙන් බැස කොළඹ කොටුව දක්වා පැමිණි බව සැකකරු පොලිසිය සිදුකළ ප්රශ්න කිරීම්වලදී පවසා ඇත.
අනතුරුව කොළඹ, කොටුවේ සිට දඹුල්ල දක්වා ගිය බවත් එහි සිට තමන් වෙනුවෙන්ම කරන්දෙණියේ සුද්දා විසින් සූදානම් කර තිබූ බස් රථයකින් මොණරාගල දක්වා ගිය බවත් ඔහු පොලිස් ප්රශ්න කිරීම්වලදී පවසා තිබේ.
ඒ අනුව බස්නාහිර දකුණ අපරාධ කොට්ඨාස විසින් අදාළ බස් රථය සම්බන්ධයෙන් සිදුකළ සොයා බැලීමේදී අනාවරණ වී ඇත්තේ, මොරටුව – කොළඹ මර්ගයේ ධාවනය වන බස් රථයකින් අදාළ වෙඩික්කරුව දඹුල්ලේ සිට මොනරාගලට රැගෙන ගොස් ඇති බවය.
අනතුරුව බස්නාහිර දකුණ අපරාධ කොට්ඨාසය විසින් එම බස් රථය රියදුරු හා එහි කොන්දොස්තරවරයා ද සමගින් ඊයේ අත්අඩංගුවට ගනු ලැබීය.
එහිදී ඔවුන්ගෙන් සිදුකළ ප්රශ්න කිරීම්වලදී හෙළි වී ඇත්තේ, අදාළ ඝාතනය සිදුකළ දිනට දින තුනකට පෙර කරන්දෙණියේ සුද්දා විසින් බස් රථය රියදුරුගේ නමට රුපියල් ලක්ෂ 65කට මිලදී ගෙන ඇති බවය.
අදාළ රියදුරු කරන්දෙණියේ සුද්දාගේ සමීපතමයෙකු බව ද පොලිසිය පැවසීය.
ඔහු පොලිස් ප්රශ්න කිරීම්වලදී පවසා ඇත්තේ, කරන්දෙණියේ සුද්දාගේ උපදෙස් මත තමන් හා කොන්දොස්තරවරයා ගොස් අදාළ වෙඩික්කරු දඹුල්ලේ සිට මොනරාගලට රැගෙන ගිය බවය.
අදාළ රියදුරු දැඩිලෙස මත්ද්රව්ය භාවිතයට ඇබ්බැහිවූවකු බවද පොලිසිය සඳහන් කළේය.
ඒ අනුව අදාළ ඝාතනය සම්බන්ධයෙන් ද විමර්ශන සිදුකළ බස්නාහිර දකුණ අපරාධ කොට්ඨාසය සැක පලකරන්නේ ලොකු පැටීගෙන් පළිගැනීම සඳහා ඔහුගේ නීතීඥවරයා ඝාතනය කිරීමට කරන්දෙණියේ සුද්දා විසින් එම උපක්රමය භාවිත කර ඇති බවටය.
