ලංකාවේ අපරාධ ඉතිහාසයේ වගේම ආදර කතාවලත් නොමැකෙන නමක් තමයි “මරුසිරා” කියන්නේ.
සිරිපාල නොහොත් මරුසිරා කියන නම ඇහුණු සැණින් එදා මුළු ලංකාවම හෙල්ලුණා. හැබැයි මේ දරුණු මිනිසා පිටුපස සිටි ඒ අහිංසක ගැහැණිය, එනම් ඔහුගේ බිරිඳ රං මැණිකා ගැන අදටත් කතා වෙන්නේ හරිම සංවේදීවයි.
මරුසිරාට මරණ දඬුවම නියම වෙලා බෝගම්බර බන්ධනාගාරයේ රඳවලා හිටපු කාලේ, ඔහුව බලන්න අවසන් වතාවට රං මැණිකා පැමිණ සිටියා. දෑතට විලංගු වැටුණු තමන්ගේ ආදරණීය සැමියා එල්ලුම් ගහට නියම වෙලා ඉන්නවා දකිද්දී ඇයගේ හිත කොයිතරම් ගැහෙන්න ඇතිද?
1975 අගෝස්තු 07 වැනිදා අළුයම ඔහුව එල්ලා මරන්න නියමිතව තිබුණා. එදා මරුසිරා එල්ලුම් ගහට ගෙන යන විට ඔහු සිටියේ සිහිසුන්ව බවටත් කතාවක් තිබෙනවා. රං මැණිකා බන්ධනාගාර පවුරෙන් පිටත සිට තම සැමියාගේ මරණය ගැන අසා සිටියේ දරාගත නොහැකි වේදනාවකිනුයි.
2014 වර්ෂයේදී බෝගම්බර බන්ධනාගාරය මහජන ප්රදර්ශනය සඳහා විවෘත කළ අවස්ථාවේදී, කාගේත් අවධානය යොමු වුණේ එක්තරා වයෝවෘද්ධ කාන්තාවක් දෙසටයි. ඒ වෙන කවුරුත් නෙවෙයි, මරුසිරාගේ ආදරණීය බිරිඳ රං මැණිකා.
වසර 39කට පස්සේ ඇය තමන්ගේ සැමියා ජීවිතයේ අවසන් කාලය ගෙවපු, තමන්ගෙන් සදහටම වෙන්වුණු ඒ බිහිසුණු බිත්තිය අසලට ආවේ මහත් කම්පාවකින්.
ඇය එදා මරුසිරා රඳවා සිටි කූඩුව දෙස බලා හඬා වැටුණු අයුරු එහි සිටි පිරිස්වල නෙතට කඳුළක් එක් කළා.
“සිරා” ගිය මඟ දිගේ ඇය පියවරෙන් පියවර ගමන් කළේ ඔහුගේ මතකයන් අතර අතරමං වෙමින්. අතීතයේ තමන් බන්ධනාගාරයේ පවුරෙන් පිටත සිට කළ අරගලය ඇය එදා විස්තර කළේ මුළු ලෝකයටම ආදරයේ තරම පසක් කරමින්.
