බණ්ඩාරවෙල නගරයේ හෝටලයක කාමරයක් තුළ පසුගිය 24 වනදා තම බිරිඳ ඝාතනය කර පළාගොස් සිටි සැකකරු කොළඹ ජාතික රෝහලේ ප්‍රතිකාර ලබමින් සිටියදී අත්අඩංගුවට ගෙන තිබෙනවා.
සැකකරු අද (27) අලුයම බණ්ඩාරවෙල පොලිස් ස්ථානය වෙත රැගෙන ආ බවයි අප වාර්තාකරු සඳහන් කළේ.
මෙලෙස අත්අඩංගුවට පත්ව ඇත්තේ කැලණිය ගෝනවල පදිංචි 50 හැවිරිදි පුද්ගලයෙක්.
පසුගිය 24 වනදා දින දහවල් හෝටල් කාමරය තුල තියුණු ආයුධයකින් පහරදිමෙන් ඝාතනයට ලක්ව තිබුණේ ඇටම්පිටිය කැන්දගොල්ල ප්‍රදේශයේ පදිංචි 40 හැවිරිදි තිදරු මවක්.
මේ සම්බන්ධයෙන් කරන ලද පරික්ෂණවලින් අනතුරුව සැකකරු හඳුනාගත් පොලිසිය ඔහු අත්අඩංගුවට ගැනීම සඳහා පරීක්ෂණ සිදුකරමින් සිටියදී ලැබුණු තොරතුරකට අනුවයි වස පානය කළ බව පවසමින් කොළඹ ජාතික රෝහලේ නේවාසිකව ප්‍රතිකාර ලබමින් සිටියදී අත්අඩංගුවට පත්වී ඇත්තේ.
ඒ අනුව බණ්ඩාරවෙල පොලිසියේ විශේෂ කණ්ඩායමක් කොළඹ ජාතික රෝහල වෙත ගොස් සැකකරු බණ්ඩාරවෙල පොලිස් ස්ථානය වෙත රැගෙන ඒමට කටයුතු කර තිබෙනවා.
සැකකරු බණ්ඩාරවෙල මහේස්ත්‍රාත් අධිකරණය වෙත ඉදිරිපත් කිරිමට නියමිත අතර බණ්ඩාරවෙල පොලිසිය වැඩිදුර විමර්ශන සිදු කරනවා.
