කඩුවක් රැගෙන පෙරහැර මාර්ගයට ඇතුළු වීමට උත්සාහ කළ පුද්ගලයෙකු මහනුවර ඇසළ පෙරහැර විශේෂ රාජකාරියේ නිරතව සිටි පොලිස් නිලධාරීන් විසින් සැකපිට අත්අඩංගුවට ගෙන තිබෙනවා.

ඊයේ (26) රාත්‍රියේ මෙම පුද්ගලයා අත්අඩංගුවට ගෙන තිබුණේ මහනුවර ජෝර්ජ් ඊ ද සිල්වා උද්‍යානය අසළ දීයි. බොරැල්ල ප්‍රදේශයේ පදිංචිකරුවෙක් වන 27 හැවිරිදි වියේ පසුවන මෙම සැකකරු අද (27) මහනුවර මහේස්ත්‍රාත් අධිකරණය වෙත ඉදිරිපත් කර තිබෙනවා.

අනතුරුව ඔහු සැප්තැම්බර් 05 වන දින තෙක් රක්ෂිත බන්ධනාගාර ගත කර කිරීමටයි නියෝග කර ඇත්තේ.

බෑගයක් තුළ දමාගෙන සැකකරු මෙම කඩුව රැගෙනවිත් තිබිය දී සොයාගෙන ඇති අතර, කඩුව කුමක් සඳහා රැගෙන ආවේද යන්න සම්බන්ධයෙන් විමසූ අවස්ථාවේ දළඳා වහන්සේට පූජා කිරීම පිණිස එය මිතුරෙකු විසින් තමන්ට ලබාදුන් බව සැකකරු පොලීසියට පවසා තිබෙනවා.

කොළඹ අපරාධ කොට්ඨාසය මඟින් 2016 වසරේ දී හෙරෝයින් මත්කුඩු ළඟ තබා ගැනීමේ සිද්ධියක් සම්බන්ධයෙන් මෙම පුද්ගලයාව අත්අඩංගුව ගෙන තිබෙන බවට සිදුකළ විමර්ශනවල දී අනාවරණය වී ඇත්තේ.

සිද්ධිය සම්බන්ධයෙන් මහනුවර පොලිසිය වැඩිදුර විමර්ශන සිදුකරනු ලබනවා.

දෙවන රන්දෝලි පෙරහැරට විශේෂ රථ වාහන සැලැස්මක්

මහනුවර ඇසළ පෙරහැර මංගල්‍යයේ දෙවන රන්දෝලි පෙරහැර අද (27) වීථී සංචාරය කෙරෙනවා.

ඒ, අනුව විශේෂ රථ වාහන සැලස්මක් ක්‍රියාත්මක කරන බවයි පොලීසිය පවසන්නේ.

පෙරහැර අද රාත්‍රී 6.46ට දළදා වීථිය, ඩී.එස් සේනානායක වීථිය, කොළඹ වීථිය, යටිනුවර වීථිය, කොටුගොඩැල්ල වීථිය, හරස් වීථිය, ඩී.එස්. සේනානායක වීථිය, රජ වීථිය ඔස්සේ ගමන්කර ගෙවැදීමට නියමිතව තිබෙනවා.

මේ අතර පළමු රන්දෝලි පෙරහැර ඊයේ (26) වීදි සංචාරය කළ අතර, පෙරහැර නැරඹීම සඳහා විශාල ජනකායක් සහභාගී වී සිටියා.

එමෙන්ම පළමු රන්දෝලි පෙරහැර දින දන්ත ධාතූන් වහන්සේ උදෙසා මීපැණි පූජා කළ ආදිවාසීන් පෙරහැර නැරඹීම සඳහා එක්ව සිටි බවයි වාර්තා වුණේ.

ශ්‍රී දළදා මාලිගාව නියෝජනය කරමින් දියවඩන නිලමේවරයා ද පළමු රන්දෝලි පෙරහැරේ ගමන් කරනු ලැබුවා.