එම තරග විස්තරය මෙසේයි.
මෙම තරගය කණ්ඩායම් දෙකටම අතිශයින් තීරණාත්මක වන්නේ මේ තරගය ජය ගන්නා කණ්ඩායම ආසියානු කුසලාන ක්රිකට් තරගාවලියේ සුපිරි සිව් දෙනාගේ වටයට සුදුසුකම් ලැබීම තීරණය වීම හේතුවෙන්.
මේ තරගයේ කාසියේ වාසිය දිනාගත් ශ්රී ලංකා නායක දසුන් ශානක පළමුව පන්දු යැවීම තෝරා ගත්තා.
කෙසේ වෙතත් එම තීරණයට බංග්ලාදේශ පිතිකරුවන්ගෙන් ලැබුණේ යහපත් ප්රතිචාරයක් නොවේ.
ඔවුන් තරගය ආරම්භයේ පටන්ම ශ්රී ලංකා පන්දු යවන්නන්ට දිගට හරහට පහර දෙන්නට වුණා.
බංග්ලාදේශ කණ්ඩායමේ පළමු කඩුල්ල මුළු ලකුණු සංඛ්යාව 19 ක් ව තිබියදී බිඳවැටුණා.
අසිත ප්රනාන්දුගේ පන්දු හමුවේ ෂබීර් රෙහෙමන් ලකුණු 5 කට දැවී ගියා.
ඉන් අනතුරුව පිටියේ එක්වූ මෙහදී හසන් සහ ෂකීබ් අල් හසන් දෙදෙනා ශ්රී ලංකා පන්දු යවන්නන්ට දැඩි ප්රහාරයක් එල්ල කළා.
මේ දෙදෙනා එකතුව දෙවැනි කඩුල්ල සඳහා ලකුණු 39 ක සම්බන්ධතාවක් ගොඩනැඟුවේ පන්දු ඕවර හතරක් තුළදී.
එම සම්බන්ධතාවට තිත තැබීමට වනිදු හසරංග සමත් වුණේ පන්දු 26 කදී ලකුණු 38 ක් ලබා සිටි මෙහෙදි හසන් ගේ කඩුල්ල දවාගනිමින්.
මෙහෙදී හසන් ඔහුගේ ලකුණු 38 සඳහා 6 පහර දෙකක් සහ හතරේ පහර දෙකක් එල්ල කර තිබුණා.
ඉන් අනතුරුව මුළු ලකුණු සංඛ්යාව 63 ක් ව තිබියදී මුෂ්ෆිකර් රහීම් ලකුණු හතරකට දවා ගන්නට චාමික කරුණාරත්න සමත් වුණා.
පන්දු 22 කට මුහුණ දෙමින් ලකුණු 24 ක් ලබාගෙන සිටි ෂකීබ් අල් හසන් දැවී ගියේ මහීෂ් තීක්ෂණගේ පන්දුවක් හමු වේ.
ඒ වනවිට බංග්ලාදේශ කණ්ඩායමේ මුළු ලකුණු සංඛ්යාව දැක්වුණේ 87ක් වශයෙන්.
අනතුරුව පිටියේ ස්ථාවර වූ අෆීෆ් හොසේන් සහ මහමුදුල්ලා දෙදෙනා ශ්රී ලංකා පන්දු යවන්නන්ට අනුකම්පා විරහිත ප්රහාරයක් දියත් කළා.
එම් සම්බන්ධතාව බිඳ වැටුණේ පන්දු 22 කට පමණක් මුහුණ දෙමින් ලකුණු 39 ක් රැස් කර ගත් අෆිෆ් හොසේයින් ඩිල්ශාන් මධුසංඛගේ පන්දු හමුවේ දැවී යාමත් සමගයි.
ඔහු සිය ලකුණු 39 ලබා ගැනීම සඳහා හතරේ පහර හතරක් සහ හයේ පහර දෙකක් එල්ල කර තිබුණා.
බංග්ලාදේශ කණ්ඩායමේ පස්වැනි කඩුල්ල බිඳ වැටුනේ මුළු ලකුණු සංඛ්යාව 144 ක් ව තිබියදී.
ඒ වන විටත් අෆීෆ් හොසේන් සහ මහමුදුල්ලා එක්ව පස්වැනි කඩුල්ල සඳහා ලකුණු 53 ක වේගවත් සම්බන්ධතාවක් ගොඩනගා තිබුණා.
බංග්ලාදේශ කණ්ඩායමේ මුළු ලකුණු සංඛ්යාව 147 ක්ව තිබියදී මොහොමඩ මහමුදුල්ලා ලකුණු විසි 22කට දවා ගන්නට චාමික කරුණාරත්න සමත් වුණා.
කෙසේ වෙතත් පන්දුවට පහර දීමේ වේගවත් පිතිකරණ රටාව අඛණ්ඩව රඳවාගන්නට බංග්ලාදේශ පසුපෙළ පිතිකරුවන් ද සමත් වීම හේතුවෙන් ශ්රී ලංකා කණ්ඩායම නියමිත පන්දුවාර 20 අවසාන වන විට බංග්ලාදේශ කණ්ඩායම කඩුලු 7 ක් දැවී ලකුණු 183 ලබාගෙන තිබුණා.
ශ්රී ලංකා කණ්ඩායම වෙනුවෙන් පන්දු යැවීමේදී වනිදු හසරංග ලකුණු 41 කට කඩුලූ 2ක් දවා ගත් අතර චාමික කරුණාරත්න ලකුණු 32 කට කඩුලු 2ක් දවා ගන්නට සමත් වුණා.
මේ හැරුණු විට දිනේශ් මධුසංඛ, මහේෂ් තීක්ෂණ සහ හසිත ප්රනාන්දු අතරේ එක් කඩුල්ල බැගින් බෙදී ගියා.
ඒ අනුව මේ තරගයේ ජයග්රහණය සඳහා ශ්රී ලංකා කණ්ඩායමට ලකුණු 184 ක් දැවැන්ත ඉලක්කයක් ඉතිරි වී තිබෙනවා.
ජයග්රහණය සඳහා ලකුණු 184 ක් ඉලක්කයක් හඹා යෑම සඳහා පිටියට පිවිසි ශ්රී ලංකා කණ්ඩායමට පැතුම් නිෂ්ශංක සහ කුසල් මෙන්ඩිස් දෙදෙනා එක්ව සාර්ථක ආරම්භයක් ලබා දුන්නා.
ඔවුන් දෙදෙනා එක්ව පන්දු ඕවර පහයි පන්දු 3 කදී ලකුණු 45ක් පළමු කඩුල්ල සඳහා එක්කලා.
එම සම්බන්ධතාව බිඳ වැටුණේ පැතුම් නිශ්ශංක එබොඩොට් හොසේන්ගේ පන්දුවක් හමුවේ ලකුණු විස්සකට දැවී යාමත් සමඟයි.
ඉන්පසු එක් අන්තයක කුසල් මෙන්ඩිස් හුදකලා සටනක නිරතව සිටියදී පිටියට පිවිසි ඉදිරිපෙළ පිතිකරුවන් ඉතා අඩු ලකුණු සංඛ්යාවන් වලට දැවී ගියා.
චරිත් අසලංක එක් ලකුනකටත්, ධනුෂ්ක ගුණතිලක ලකුණු 11 කටත්, භානුක රාජපක්ෂ ලකුණු දෙකකටත් මෙලෙස දැවී ගියේ කුසල් මෙන්ඩිස්ගෙ කරමත වැඩි බරක් පටවමින්.
ශ්රී ලංකා කණ්ඩායමේ පස්වැනි කඩුල්ල ලෙස ක්රීඩාගාරයට ගියේ ලකුණු 60 ක් ලබාගත් කුසල් මෙන්ඩිස්.
ඔහුගේ කඩුල්ල මුස්ටාෆිසුර් රෙහෙමාන් දවාගත් අතර කුසල් සිය ලකුණු 60 සඳහා 6 පහර 3ක් සහ හතරේ පහර 4ක් එල්ල කර තිබුණා.
කුසල් මෙන්ඩිස් නැවත ක්රීඩාගාරයට හැරී යන විට ඔහු සහ නායක දසුන් ශානක අතර පස්වන කඩුල්ල සඳහා පන්දු 34 කදී ලකුණු 54 ක සම්බන්ධතාවක් ගොඩනැගී තිබුණා.
ශ්රී ලංකා කණ්ඩායමේ හත් වැනි කඩුල්ල ලෙස බිඳ වැටුනේ නායක දසුන් ශානකගේ කඩුල්ලයි.
පන්දු 33 කදී ලකුණු 45 ක් ලබා සිටි දසුන් මෙහෙදි හසන්ගේ පන්දුවක් හමුවේ දැවී ගියා.
දසුන් ඔහුගේ ලකුණු 45 ට හතරේ පහර තුනක් සහ හයේ පහර දෙකක් එල්ල කර තිබුණා.
ඉන්පසු ශ්රී ලංකා කණ්ඩායම ජයග්රහණය කරා කැඳවාගෙන යාමට ඉතිරිව තිබූ එකම බලාපොරොත්තුවත් බිඳ වැටුනේ චාමික කරුණාරත්න ලකුණු 16 ට දුවද්දී දැවී යාමත් සමඟයි.
ඒ වන විට ශ්රී ලංකා කණ්ඩායමට පන්දු 9 කදී ලකුණු දාහතරක් ලබාග ගත යුතුව තිබුණා.
කෙසේ වෙතත් තරගයේ ආරම්භයට පෙරම අභිමානය සම්බන්ධයෙන් මතු වූ වාග් සංග්රාමය ට කදිම පිළිතුරක් සපයන්නට ශ්රී ලංකා කණ්ඩායමේ පසුපෙළ පිතිකරුවන්
සමත් වුනා.
සිය මංගල පන්දුවාර 20 තරගයට එක් වූ අසිත ප්රනාන්දු ශ්රී ලංකා කණ්ඩායම ජයග්රහණය කරා රැගෙන ගියේ ඔහු මුහුණ දුන් පන්දු තුනෙන් දෙකක්ම හතරේ සීමාව කරා පිටත් කර හරිමින්.
කෙසේ වෙතත් තරගයේ ජයග්රහනය තීරණය කෙරුණේ දහනව වැනි පන්දු ඕවරය තෙවැනි පන්දුව නිපන්දුවක් විමත් සමගයි.
මේ ජයග්රහණයත් සමග ශ්රී ලංකා කණ්ඩායමට ආසියානු කුසලාන ක්රිකට් තරගාවලියේ සුපිරි සිව්දෙනාගේ වටයට එකතු වීම සඳහා අවස්ථාව හිමිවනවා.