හිටපු ජනාධිපති ගෝඨාභය රාජපක්ෂ මහතා තායිලන්තයේ බැංකොක් නුවරට පැමිණි බව රොයිටර් පුවත් සේවය වාර්තා කරනවා.
සිංගප්පූරුවේ රැඳී සිටි හිටපු ජනාධිපතිවරයා තායිලන්තය බලා යාම සඳහා පිටත් වුණේ අද පස්වරුවේයි.
මේ අතර හිටපු ජනාධිපති ගෝඨාභය රාජපක්ෂට තම රටට ඇතුලු වීම සඳහා අවසර ලබා දී ඇත්තේ මානුෂීය හේතුන් මත බවත් වෙනත් රටක ස්ථිර රැකවරණය ලබාගන්නා තුරු ඔහුට තාවකාලිකව රැඳී සිටිය හැකි බවත් තායිලන්ත අග්‍රාමාත්‍යවරයා පවසනවා.
මෙරට ජනතාව දැක්වූ විරෝධතා හේතුවෙන් පසුගිය ජූලි 13 වැනිදා මාලදිවයින බලා පිටව ගිය ජනාධිපති ගෝඨාභය රාජපක්ෂ මේ වන තුරු රැදී සිටියේ සිංගප්පූරුවේයි.
දින 14ක කාලයක් සිංගප්පූරුවේ රැඳී සිටීමට පළමුව ඔහුට අවස්ථාව ලබා දුන් අතර පසුව එම කාල සීමාව අගෝස්තු 11 දක්වා දීර්ඝ කෙරුණා.
ජනාධිපති ගෝඨාභය රාජපක්ෂ තායිලන්තය බලා පැමිණීමට නියමිත බවට වාර්තා වුණේ ඒ අතරතුරයි.
ඒ පිළිබඳ අදහස් දක්වමින් තායිලන්ත අග්‍රාමාත්‍ය ප්‍රයූත් චන් ඕ චා ප්‍රකාශ කර ඇත්තේ ගෝඨාභය රාජපක්ෂගේ පැමිණීම මානුෂීය හේතුන් මත සිදුවන්නක් බවයි.
එරට රැදී සිටින කාලය තුල කිසිදු දේශපාලන කටයුත්තකට ඔහුට අවසර හිමි නොවන අතර එම කාලය ඇතුලත සුදුසු රටක රැකවරණය ඔහුට ලබා ගැනීමට හැකිවනු ඇති බවයි තායිලන්ත අග්‍රාමාත්‍ය ප්‍රයුත් චන් ඕ චා සඳහන් කළේ.
මේ අතර හිටපු ජනාධිපති ගෝඨාභය රාජපක්ෂ තවදුරටත් රාජ්‍යත්‍රාන්තික බලපත්‍රයක් දරණ බැවින් ඔහුට දින 90ක කාලයක් තායිලන්තයේ රැඳී සිටීමට හැකි බව එරට විදේශ අමාත්‍ය දොන් ප්‍රමුත්විනායි ප්‍රකාශ කළා.
ඔහු වැඩිදුරටත් ප්‍රකාශ කර ඇත්තේ හිටපු ජනාධිපතිවරයාගේ තායිලන්ත සංචාරය සම්බන්ධයෙන් ලක් රජයෙන් විරෝධතාවක් එල්ල වී නොමැති බවයි.
කෙසේ වෙතත්, තායිලන්ත රජය හිටපු ජනාධිපතිවරයා වෙනුවෙන් අනුග්‍රහයක් නොකරන බවත් තායිලන්තයේ සිටින කාලය අතරතුරදී තායිලන්තයට කිසිදු ගැටළුවක් මතු නොකරන බවට වන කොන්දේසිය මත හිටපු ජනාධිපතිවරයාට එරට රැදී සිටීමට අවසර ලබා දී ඇති බවත් තායිලන්ත විදේශ අමාත්‍යවරයා වැඩිදුරටත් ප්‍රකාශ කර තිබෙනවා.
මේ අතර හිරු ප්‍රවෘත්ති අමතමින් හිටපු ජනාධිපති ගෝඨාභය රාජපක්ෂ සඳහන් කළේ තමන් දැනට සිංගප්පූරුවේ රැදී සිටින අතර බැංකොක් නුවර බලා පිටත්ව යාමට බලාපොරොත්තුවෙන් පසුවන බවයි.
තමන් ගැටළුවකින් තොරව ඉතා සුවෙන් පසුවන බවත් ඔහු හිරු ප්‍රවෘත්ති වෙත සඳහන් කළා.
Source:Hirunews
