“අවාරේ ශ්රී පාදස්ථාන වන්දනාවේ යන එක වළක්වන්න මට අවශ්ය නෑ. එහෙම නීතියකුත් නෑ. විවිධ අධ්යයන කටයුතු සඳහා යන විශ්වවිද්යාල සිසු සිසුවියන්ට, විවිධ ආයතනවල අයට අවාරයේ ශ්රී පාදස්ථානයට ගියාට කිසිඳු ගැටලුවක් නැහැ.” යැයි ශ්රී පාදස්ථානාධිපති, රත්නපුර දිසාවේ ප්රධාන සංඝනායක, පැල්මඬුල්ල රාජමහා විහාරය හා රත්නපුර පොත්ගුල් රාජමහා විහාරය යන උභය විහාරාධිපති, ත්රිපිටකාචාර්ය බෙන්ගමුවේ ධම්මදින්න නායක ස්වාමීන් වහන්සේ පැවැසූහ.
උන් වහන්සේ මේ බව ප්රකාශ කර සිටියේ මෙවර සිරිපා වන්දනා වාරය අවසන් කිරීම නිමිත්තෙන් හා පෙරහර කටයුතු සංවිධානය වෙනුවෙන් පැල්මඬුල්ල ප්රාදේශීය ලේකම් කාර්යාලයේදී ඉකුත්දා (13) පැවැති විශේෂ සාකච්ඡාවේදීය.
එහිදී වැඩිදුරටත් අදහස් දැක්වූ නායක හිමියෝ මෙසේ ද කීහ.
“අවාරයේ සිරිපා මාර්ගවල විදුලිය ඇතුළු පහසුකම් නෑ. ආරක්ෂාවට පොලිස් නිලධාරීන් හෝ සෞඛ්ය සේවකයන් ඇතුළු කණ්ඩායම් නෑ. මේ නිසා අවාරයේ සිරිපා වන්දනාවේ යන අයට කිසිම ආරක්ෂාවක් නෑ. යම් අයකු එහිදී රෝගාතුර වුණොත් දැඩි අවදානමක් මතු වෙනවා. ගියවර අවාරේ ගිය ඇතැම් අය ජල නළවලට, අම්බලන්වලට හා වැසිකිළිවලට සිදුකර තිබූ හානිය පිළිසකර කිරීමට රුපියල් ලක්ෂ 20ක් පමණ අමතරව වැය වුණා. පරිසරයට මුදා හැර තිබූ නොදිරන කසළ ඇතුළු අපද්රව්ය ඉවත් කරන්න කණ්ඩායම් යොදවා නැති බැවින් පරිසරයටත් ලොකු හානියක් සිදුව තිබුණා.
අවාර කාලය වෙන් කර තිබෙන්නේ මෙහි පරිසරයට, සතා සිවුපාවට යළි හැඩගැසෙන්නයි. එම කාලයෙත් සිරිපා වන්දනාවේ ගියහොත් ගහකොළට හා සතා සිවුපාවන්ටත් නිදහසක් නැති වෙනවා. ඒ නිසයි අවාර කාලයේ සිරිපා වඳින්න යන අයට අවසර නොදුන්නේ. යනව නම් ඒ සඳහා රත්නපුර දිස්ත්රික් ලේකම්වරයාගෙන් අවසරයක් ගත යුතුයි. මේක නීතියක් නෙවෙයි ඉල්ලීමක්. සමාජ මාධ්ය ඇතුළු විවිධ මාධ්ය හරහා ප්රචාරය වන තොරතුරු අනුව මෙය බොහෝ පිරිසක් වැරදියට වටහාගෙන තිබෙනවා.”
මෙම සාකච්ඡාවට පැල්මඬුල්ල ප්රාදේශීය ලේකම්වරයා ඇතුළු පිරිසක් එක්ව සිටියහ.
කුරුවිට – කේ.ඒ. සුනිල්
