පාකිස්ථාන හිටපු අග්‍රාමාත්‍ය ඉම්රාන් ඛාන් රඳවා සිටින අඩියාලා බන්ධනාගාරය (Adiala Jail) විසින්, ඔහු මාරු කර ඇති බවට හෝ සෞඛ්‍ය තත්ත්වය අයහපත් බවට සමාජ මාධ්‍යවල පැතිර යන සියලුම කටකතා මුළුමනින්ම බැහැර කර තිබෙනවා.
බන්ධනාගාර පරිපාලනය අවධාරණය කරන්නේ හිටපු අගමැතිවරයා “සම්පූර්ණයෙන්ම නිරෝගීව සිටින” බවත්, ඔහුට “සම්පූර්ණ වෛද්‍ය ප්‍රතිකාර” ලැබෙන බවත්.
මේ අතර, පාකිස්ථාන ආරක්ෂක අමාත්‍ය ඛවජා අසීෆ් (Khawaja Asif) ප්‍රකාශ කර ඇත්තේ, ඉම්රාන් ඛාන්ට පෙර සිරකරුවන්ට මුහුණ දීමට සිදු වූ තත්ත්වයන්ට වඩා බොහෝ සුවපහසු තත්ත්ව යටතේ ඔහු රඳවා සිටින බවයි.
ඒ අනුව, ඔහුට රූපවාහිනියක්, ව්‍යායාම උපකරණ, ඇඳක් සහ මෙට්ටයක් ඇතුළු පහසුකම් සපයා ඇති බව අසීෆ් සඳහන් කර ඇති බවයි විදෙස් මාධ්‍ය සඳහන් කරන්නේ.
තමන් සිරගතව සිටි කාලය සිහිපත් කළ අසීෆ්, ඛාන්ගේ තත්ත්වය පිළිබඳව පීටීඅයි නායකයන් අතිශයෝක්තියෙන් කටයුතු කරන බවට චෝදනා කර තිබෙනවා.
කෙසේ වෙතත්, ඉම්රාන් ඛාන්ගේ සෞඛ්‍ය තත්ත්වය පිළිබඳව පවතින කනස්සල්ල හේතුවෙන් පසුගිය සතියේ ඔහුගේ සහෝදරියන් තිදෙනෙකුට අඩියාලා බන්ධනාගාරයෙන් පිටතදී පොලිස් නිලධාරීන් විසින් පහර දීමක් සිදු කළ බවට වාර්තා වෙනවා.
ඛාන්ගේ සහෝදරියක වන නෝරීන් නියාසි (Noreen Niazi) පවසා ඇත්තේ, “අපි සාමකාමීව විරෝධය පළ කළා. කිසිදු අනතුරු ඇඟවීමකින් තොරව විදුලි පහන් නිවා දමා, පන්ජාබ් පොලිස් නිලධාරීන් විසින් කෲර හා සංවිධානාත්මක ප්‍රහාරයක් එල්ල කළා” යනුවෙන්.
මෙම සිද්ධියෙන් පසු දහස් ගණනක් PTI ආධාරකරුවන් බන්ධනාගාරය ඉදිරිපිට රැස්වී, ඛාන් හමුවීමට අවසර ඉල්ලා විරෝධතා පවත්වා තිබෙනවා.
